Rev 22 | ZomZIV | STEP | Tua ciangin vansawltak in nuntakna guntui hong laka, crystal bangin cim sitset a, Pasian le Tuuno tokhom pan luangkhia-in,

Revelation of John 22

Nuntakna Gun

1 Tua ciangin vansawltak in nuntakna guntui hong laka, crystal bangin cim sitset a, Pasian le Tuuno tokhom pan luangkhia-in, 2 khuapi kongzing lian laizangah a luangsuk hi. Tua gunpang tuakah nuntakna singkung po-in, kha simin gah a, kum khatin sawm le nih vei a gah hi. Tua singkung a tehte minamte damsak nading ahi hi. 3 Kihamsiatna a om nawn kei ding hi. Tua khuapi sungah Pasian le Tuuno tokhom om dinga, a nasemte in ama na a sem ding uh hi. 4 Amaute in ama maitang mu ding uh a, amaute taltangah ama min a tuang ding hi. 5 Tua mun ah zan a om nawn kei ding hi. Topa Pasian vang in amaute taan ding ahi manin meivak tang le ni tang a kisam nawn kei ding hi. Amaute in a tawntung in uk den ding uh hi. ^a

6 Tua vansawltak in, “Hih thute muan takin thutak ahi hi. Topa kamsangte khate’ Pasian in a pel lo-a, hong tungpah ding nate a nasemte a lak dingin ama vansawltak hong sawl ahi hi,” hong ci hi. ^b

Jesu Hong Pai Ding

7 “Ngai in, kong paipah ding hi! Hih laibu sunga genkholhna thute a kem cingte thupha ngah ahi hi.” ^c

8 Keimah John in hih nate mu-a, a za pa ka hi hi. Hihte mu-a ka zak khit ciangin hih thute hong lak vansawltak khe phungah a bia dingin ka boksuk hi. 9 Ahi hangin amah in kei kiangah, “Hih kei in! Kei zong nang le na sanggam kamsangte le hih laibu sunga thute a kemcingte khempeuh tawh nasem khawm khat mah ka hi hi. Pasian bia in!” hong ci hi. ^d

10 Tua ciangin ka kiangah “Ahun nai ta ahi manin hih laibu-a genkholhna thute bilhcip kei in, 11 mawh bawlte in bawl lailai henla, a tatsiate tatsia lailai uh hen la, amaana gamtate gamta lailai hen; a siangthote siangtho lailai ta hen,” ci-in hong gen hi. ^e

12 “Ngai in, kong pai pah ding hi! Ka pahtakman ka kiangah om hi; mi khempeuh tungah ama hihsa tawh kizui-in ka pia ding hi. 13 Keimah, Alpha le Omega, a Masapen le a Nunungpen, a Patna le a Tawpna ka hi hi. ^f

14 “Nuntakna singkung neih theih nading le kongpite tawna khuapi sunga lut nading thu neih theih nadinga a puantual uh a sawpsiangte thupha ngah ahi uh hi. 15 A pualam ah ahileh, uite, dawi-ai tawite, numei le pasal paktatte, tualthatte, milim biate, le zuauphuah nuamsa-a, zuauthu gente peuhmah a om ding uh hi. ^g

16 “Keimah Jesu in, pawlpite ading in hih teci panna nang ^{▼▼22.16 Greek ah a tam genna} tunga gen dingin ka vansawltak kong sawl zo hi. Kei in David Zungpi le ama Suan le a tangpha Zingsol ka hi hi.” ⁱ

17 Tua Kha le tua mo in, “Hong pai in!” ci uh hi. A za peuh in, “Hong pai in!” ci ta hen. A dangtak peuhmah hong pai ta hen. A ut peuhmah in letsonga kipia nuntakna tui sang ta hen. ^j

18 Hih laibu sunga genkholhna thute a za peuhmah ka vauhilh hi: Mi khatpeuh in tuate banah bang khatpeuh a behlap leh Pasian in ama tungah hih laibu sunga kigentel gimnate a behlap ding hi. 19 Mi khatpeuh in hih genkholhna laibu sung pana thute a paihkhiat leh Pasian in ama tung panin hih laibu sunga kigentel nuntakna singkung pan le khuapi siangtho pana a tanh ding a lakkhiatsak ding hi. ^k

20 Hih nate teci a pangpa in, “Hihi, kong paipah ding hi,” a ci hi. ^l

Amen. Topa Jesu aw, hong pai ta in.

21 Topa Jesu hehpihna Pasian mite tawh omkhawm ta hen. Amen.